منتديات طب الإسلامية

مرحبا بك في منتديات طب الإسلاميه ...

    نحو أسماء سودانية خالية من الدلع والمياعة

    شاطر
    avatar
    نصر الدين الزبير
    مراقب عام
    مراقب عام

    الدفعة : العاشرة
    عدد المشاركات : 1450
    تاريخ التسجيل : 04/09/2008
    نقاط التمييز : 4480
    التقييم : 5
    دولة الإقامة : السودان

    نحو أسماء سودانية خالية من الدلع والمياعة

    مُساهمة من طرف نصر الدين الزبير في الخميس 31 ديسمبر 2009, 16:31

    نحو أسماء سودانية خالية من الدلع والمياعة



    أسماؤنا السودانية القديمة الأصيلة، كان من الصعب بل المستحيل بأن تأتي لها باسم دلع، فمهما بلغت براعتك فلا يمكنك أن تدلّع أسماء مثل: بلة، الطريفي، أب جيبين، التجاني الخزين، عجبين، الزبير، أب كساوي، الصديق، فضل المولى، فتح الرحمن، عبد الجبار، البشير،عكاشة، الجنيد، تيراب، الريّح، الماحي، حمد النيل، حسب الله،حسب الرسول , جبارة الله، أب سقرة، البي كيفو، تميم الدار، جبر الدار، عمسيب الجاك، الجزولي باشكار ,وغيرها..

    عليْ النعمة تحاول تدلع أي واحد من الأسماء الفوق ديل إلا ضهرك كع ينكسر، لأنها أسماء قوية زي الخرسانة... أسماء مضببة ضد التدليع زي العكاكيز.. أسماء أهلنا زمان أسماء رجال وما في أي طريقة لتمييعها أو تدلعيها،

    حتى النسوان عندنا كان أسماهن صلبة ومحتشمة، وتنافس أسماء الرجال! في قوتها وخشونتها، فنلقى أسماء مثل ست النفر، الساتر الله، أم حقين، البتول، سكينة، التاية، نفيسة، النخيل، أم زين، بت الجقمتها وغيرها، والواحدة حتى لو أهلها كانوا متحررين، بالكتير يسموها الصندلية، ومع ذلك ما تقدر تشوفها أو تشم ريحتها، النسوان كانن بنات خدور...

    والراجل ذاتو بيكون معجب باسم أمو المحتشم وتلقاهو يحلف بيهو في الصغيرة والكبيرة فنسمع: أنا ولدك آآآ ام زين .. أنا ولدك آآآ البخيتة.. هسه أولاد الزمن ده يقولوا شنو ويحلفوا باسم منو.. معقول الواحد يقدر يقول: أنا ولدك يا عبق أو أنا ولدك يا رنا؟

    أهلنا الكبار الزمان كانوا ما بعرفوا الني وكل شيء عندهم نجيض. الني بدوهوا النار..

    عليْ الطلاق تنطق الاسم كده لما شعرة جلدك تكلّب، وتتنفخ وجضومك تتورّم من العجب والخيلاء بهذه الأسماء

    أب كريق في اللجج
    سدّر حبس الفجج
    عاشميق حبل الوجج
    أنا أخويا مقلام الحجج

    أبشر آ جنا .. حررّم تبشر.. أبشر آ جنا التقدْ مركوبك..

    مش زي أسماء الأيام دي، شدة الأسماء ما بقت مايعة تقررررّب تخت الاسم في التلاجة عشان يجمد ويبقى اسم رجال.

    شوفوا الأسماء دي: وائل، وضاح، وحيد، وليد، وديع، ربيع، مازن، تامر، لؤي، راني، هاني، نادر، حمادة، طلال، أيمن، مهند، وفائى, رامى , إيهاب وغيرها..

    والأسماء دي رغم مياعتها لكن الناس برضو دلعوها، فحصل ليها ما يعرف في اللغة بتمييع المايع وهو محرّم لغوياً فسمعنا ب: هنو، ولي، مزوني، تموري، عموري، ندوري، أيموني، هنودي، هوبة وغيرها من الأسماء المايعة الما شادة حيلها...

    وكذلك غناهم كان غناء رجال وأصواتهم كانت أصوات رجال،

    كان المغني يغني الليل كلو بدون مايك وصوتو تلقاهو زي الجبخانة
    يا ليل أبقالي شاهد على نار شوقي وجنوني

    وناس زمان ديل حتى كعكهم كان كعك رجال.. تدخل الكعكة في خشمك كده لما يغلبك تلوكها وتقعد تقرقش فيها كُرُم كُرُم زي الخروف القاعد يصقع في الجرة. والآن جابوا لينا الكعك المايع بشتى أنواعو تدخل القطعة في خشمك تجي تلوكها تلقاها عملت (سواح) وما تعرف ! نفسك هل أكلتها ولا ما كانت في قسمتك..

    نفس الشيء ده بينطبق على الولادة، زمان الواحدة تلد من خمسة لعشرة وكل سنة تساهم مع زوجها في مصاريف البيت بإنجاب طفل جديد، ومرات لو الظروف ساعدتها ممكن في نفس السنة تلد طفل وتشرع في وضع حجر الأساس لطفل جديد، ومرات الراجل ذاتو من كترة الولادة، ما بعرف أسماء أولادو ومنو الأكبر ومنو الأصغر فيهم.. الراجل يسأل مرتو: إنتِ آآآ الزينة دحين كبير ضيف الله ولا كرم الله ؟ فتجيبه الزينة باستغراب: أجي يا راجل: شن جاب ضيف الله لكرم الله! أنا لما ولدت كرم الله ده، ضيف الله كان يا دوووب بيحبا، لكنهم الاتنين مولودين! في نفس السنة المات فيها خالي عبد الرحمن...

    بنات الزمن ده الواحدة إلى أن يتخرج ولدها من kg2، حتى يقولوا ليك فلانة قاعدة تتوحّم.. وهو شن الوحم؟ الواحدة وحمها ذاتو مخالف وضد العادات والتقاليد.. تلقاها متوحمة ليها على تفاح لبناني أو زبيب إيراني أو عنب إيطالي أو مهند تركي، فيطلع ليها الولد باطل ومنعّم ومرخ رخ ،والواحدة أصلها ما بتراعي ظروف زوجها.. زمان حتى وحم حبوباتنا وأمهاتنا كان وحم رجال ووحم بسيط وسهل التنفيذ ، الواحدة تتوحم على أم بقبق فيقوم يطلع الولد لايوق وعبيط أو تتوحم على ويكاب مرس فيطلع الولد بتاع مرايس وشطوط! وكمونية .. نحن ناس بتعيش حياتها بالكمونيّة والنيّة السليمة)..

    أهلنا الزمان كانوا متباشرين وحنينين، بكاهم شهر وعرسهم شهرين، والواحدة لما يموت راجلها من شدة الحزن والأسف والإخلاص، بدل أربعة شهور وعشرة يوم، تتحبس عليهو ثمانية شهور وعشرين يوم، لأنو أصلنا ما كنا بنعرف الشوية..
    عليْ الجزيمة في الزمن المايع ده حتى شطتنا بقت مايعة وما بتحرق.. ونحن والله شعب لو ما حس بالشطة في جوفو تسوي تح تح، الأكل ما ينفعو. أنا ود التور البتنتّح ومن الشطة ما بقول أحححححح الزمن ده بقى زمن الكيتشاب والمايونيز، أما الشطة الخضراء وشطة القبانيت فزمنهم فات وغنايهم مات..
    الناس هجرت المطاعم وبقوا مستعجلين وما عندهم وقت للقعاد عشان كده اتجهوا للكافتيريات، الأكل كلو بقى عبارة عن بوفتيك وطعمية وبرجر وما شابه، والناس بقوا زي المجانين تلقاهم ياكلوا ماشين ويتكلموا ماشين وكان قلت لزول سلام عليك لا بسمعك ولا برد عليك.. مشيت السودان قبل سنة ما لقيت زول يتونس معاي وفي النهاية جيت راجع وشنطتي مليانة ونسة وشوق للناس الزمان...

    وكلابنا برضها بقت مايعة وكسلانة ومسكينة وما بتهوهو في زول، الكلب تجي ماشي فوق ليهو ما يقول ليك هوْ، ولو بقى نشيط خلاص، يقوم ينبح فيك بتهوهوة واحدة تاني ما يزيدها، كأنو عامل ليك مس كول.. مرة ناقشت مسألة عدم مبالاة كلاب اليوم مع واحد كلب، فقال لي: زمان كان بيطغى الحماس والانفعال على أدائنا ككلاب، وكنا بننبح في الفاضية والمليانة، لكننا لما شفنا الحكومة ما بتدفع لينا مواهي وحاولت تستملحنا، قلنا ما لنا ومال المشاكل والعباطة الفي الفارغ.. ونحن الآن في ظل نظام عالمي جديد ولن ننبح ببلاش لأنو في حاجة اسمها الملكية الفكرية وأصواتنا دي لازم تقيّم التقييم المناسب واللي عاوز ليهو (هوت دوق) يشوفوا بعيد مننا، نحن خلاص ودعنا عهد العباطة والتهور.
    فقلت في نفسي: يا حليل زمان وأيام زمان.. لما الكلاب كانت بتسك الشفّع وتشرط هدومهم.. الآن نبيحها ذاتو بقى مشروط.. زمان تجي ماشي تلقى الكلب منتظرك في الطريق مليان جسارة وعنفوان ولسانو حالو يقول يا دنيا ما فيك إلا أنا، أما الآن فالكلاب بقى مغضوب عليها وضالة ومهمشة وبتعيش على حافة النسيان ولو نظمت نفسها كويس ممكن تدخل الغابة أو تقيم في فنادق وتعلن التمرد وتعمل ليها حركة تمرد وممكن تسميها حركة تحرير الكلاب وتختصرها في كلمة (حتك)..

    يا جماعة الكلام ده عيب في حقنا وما بصح في حق شعب عاش (علماً) بين الأمم .. ويا جماعة كفانا تمييع أسماء وتمييع كعك وتمييع وحم وتمييع فحولة وتمييع قضايا وتمييع مياعة وخلونا نرجع لقديمنا ونخلي في البنسوي فيهو ده، الكلام ده بالحيل ما سمح في حقنا ..



    حليل زمن الصبا الماضى حليل زهر الحياة الزاهر
    حليل زمن الحبيب راضى وحليل زمن الهوى الطاهر
    حليلو الأبلج الباسم حليلو الكاحل الناير
    حليل قمر السما القاسم لياليه وصبح داير
    آه لو آه تفيد مجروح والمثل القديم ساير
    رهاب ماحصلو الجاري وسماك ما حصلو الطاير
    تجدنى مراقب أخبارك اذا النسمات بها تخابر
    تجدني على الفراش مضنى وتجدنى على الأسى صابر
    أنا البعدك أصون عهدك وليتك كنت بى خابر
    وليتك مرة تذكرنى ولو في ذكرة الغابر


    _________________


    avatar
    مصطفى تاج السر
    عضو ممــيَّز
    عضو ممــيَّز

    الدفعة : الخامسة عشر
    عدد المشاركات : 340
    تاريخ التسجيل : 01/03/2009
    نقاط التمييز : 3804
    التقييم : 2
    دولة الإقامة : سوداننا الحبيب

    رد: نحو أسماء سودانية خالية من الدلع والمياعة

    مُساهمة من طرف مصطفى تاج السر في الأحد 03 يناير 2010, 10:35


    بسم الله الرحمن الرحيم
    و به نستعين

    و الصلاة و السلام على أشرف الخلق أجمعين
    سيدنا محمد صلى الله عليه و سلم


    القائل :

    ( لعن الله المتشبهات من النساء بالرجال و المتشبهين من الرجال بالنساء)

    الاخ العزيز / نصر الدين

    و الله كلام في الصميم و تسلم إيدك يا دكتور .......... إنت عارف يا نصر الدين و الله المصيبة أعظم من كدا بكتير , يا ريت لو الحكايه وقفت على الاسماء العجيبة و الاصوات الرقيقة و الحلاقات السخيفة . الطامة الكبرى أخي العزيز هي ما أصبح يعرف بالبنطلون الناصل ............... قمة في الانحطاط و تردي الذوق السليم
    و كل هذا نتيجة التقليد الأعمى وخواء الفكر وضعف العقيدة والبعد عن الدين . أعوذ بالله ,,,,,, حاجة تقرف . وبعد دا كلو الواحد لو نصحتو يقول ليك دي الموضة و دي الحضارة

    سبحاااااان الله

    حليل زمن العراقي والصديرية و المركوب و الجلابية و العمة و الطاقية


    يديكم العافية

    avatar
    رامي عبداللطيف
    عضو ســـاحر برونزي
    عضو ســـاحر برونزي

    الدفعة : الحادية عشر
    عدد المشاركات : 604
    تاريخ التسجيل : 04/03/2009
    نقاط التمييز : 4226
    التقييم : 3
    دولة الإقامة : السعودية

    رد: نحو أسماء سودانية خالية من الدلع والمياعة

    مُساهمة من طرف رامي عبداللطيف في الأربعاء 27 يناير 2010, 07:03

    السلام عليكم ورحمة الله وبركاته
    بعد غياب طويل عجبني هذا الموضوع من اخي وحبيبي نصر الدين
    او بالاحرى حرقـني
    المهم سلامي للجميع
    اخي نصر الدين ما لفت انتباهي
    على قولة عادل امام ( هو انا اسمي مكتوب..
    فعلا اسمي مكتوب كما قلت من اسماء المياعة
    اخي الحبيب ....
    المشكلة ليست في الاسماء المشكلة في الشخص نفسه
    المشكلة في الزمان الذي نعيش فيه
    انا داير اسالك كم سؤال ولازم جدا اجد الاجابة منك
    1_ماذا تقترح بان تكون اسماؤنا؟
    2-اريد ان اعرف ماذ تريد تسمية اولادك انشالله عندما يعطيك ربي هذه النعمة التي كلنا نحلم بها وتجد الواحد منا يحلم بالاسماء التي سوف يطلقها عليهم
    3-انا ارى بان اسمك من الاسماء القوية وفيه نصرة للدين ولكن السؤال اللي بحيرني اريد ان اعرف ايش بدلعووك اصحابك
    اخي نصر ما رايك باسم محمد اليس هو اسم اشرف الخلق صلى الله عليه وسلم ؟
    وما رايك باسم عمر وابو بكر وعلي
    الم يصبحوا حمووودي وعمووري وبكوري وابو علووة
    المشكلة ليست في الاسم
    المشكلة في الشخص
    وفي المحيط الذي يعيش فيه
    وشكرا
    مع تحياتي
    avatar
    سودانية
    عضو نشيط
    عضو نشيط

    الدفعة : 12
    عدد المشاركات : 74
    تاريخ التسجيل : 15/01/2010
    نقاط التمييز : 3278
    التقييم : 1
    دولة الإقامة : السودان

    رد: نحو أسماء سودانية خالية من الدلع والمياعة

    مُساهمة من طرف سودانية في الأربعاء 27 يناير 2010, 18:53


    السلام عليكم . ازيكم كلكم ان شاءالله تمام
    اول حاجة بستأذنك اخ نصرالدين أرد على الاخ رامي
    تاني حاجة ياد/رامي لا تزعل ولا تتحرق الزول دا ماقاصد حاجة اكيد والتعبير عن الراي لا يعني بالضرورة ان يكون هذا الراي صحيحا
    تالت حاجة ديننا يحب الاسماء ذات المعاني السهلة بدون تشبه طبعا فقد ورد في الاثر
    عَنْ ابْنِ الْمُسَيَّبِ عَنْ أَبِيهِ : أَنَّ أَبَاهُ جَاءَ إِلَى النَّبِيِّ صَلَّى اللَّهُ عَلَيْهِ وَسَلَّمَ فَقَالَ : مَا اسْمُكَ ؟ قَالَ : حَزْنٌ ؟ قَالَ : أَنْتَ سَهْلٌ . قَالَ : لَا أُغَيِّرُ اسْمًا سَمَّانِيهِ أَبِي . قَالَ ابْنُ الْمُسَيَّبِ : فَمَا زَالَتْ الْحُزُونَةُ فِينَا بَعْدُ . والحزونة : الغلظة والقساوة
    واسم رامي معناه القناص , الملقي للسهام ودا اسم رماية وحروب يعني اسمك طلع براءة من المياعة
    واخيرااااا اسفة جدا على التدخل والبرية دي
    avatar
    رامي عبداللطيف
    عضو ســـاحر برونزي
    عضو ســـاحر برونزي

    الدفعة : الحادية عشر
    عدد المشاركات : 604
    تاريخ التسجيل : 04/03/2009
    نقاط التمييز : 4226
    التقييم : 3
    دولة الإقامة : السعودية

    رد: نحو أسماء سودانية خالية من الدلع والمياعة

    مُساهمة من طرف رامي عبداللطيف في الخميس 28 يناير 2010, 20:27

    تحية عطرة
    اشكرك دكتورة سودانية
    بس انتي كده بتردي على كلام الاخ نصر ما على كلامي
    لانو كلامك بناقض كلامو
    والاخ نصر ذكر اسمي من ضمن اسماء المياعة

    هذا من ناحية
    ومن اخرى
    في هذا الوقت الاسم لا يمثل شيئا من حامل الاسم
    كم استدليتي عليه يا دكتورة

    والادلة كثيرة في هذا الزمن على ذلك
    فرب خالد لا يشبه ابن الوليد
    وعلي ذلك تستمر الامثلة
    الموضوع مش محرقني
    بس حبيت اوضح انو الاسم لا يدل على مياعة الشخص ام رجولته
    ودمتي
    avatar
    نصر الدين الزبير
    مراقب عام
    مراقب عام

    الدفعة : العاشرة
    عدد المشاركات : 1450
    تاريخ التسجيل : 04/09/2008
    نقاط التمييز : 4480
    التقييم : 5
    دولة الإقامة : السودان

    رد: نحو أسماء سودانية خالية من الدلع والمياعة

    مُساهمة من طرف نصر الدين الزبير في السبت 30 يناير 2010, 00:19

    رامي عبداللطيف كتب:
    الاخ نصر ذكر اسمي من ضمن اسماء المياعة

    Very Happy Very Happy Very Happy
    رامى ياعسل
    انا والله لم اقصدك ولم اقصد اى شخص اخر بهذا الموضوع
    الموضوع دا نازل فى منتدى الدفار فاذن هو مناكفة ليس الا
    انا اتفق معك تماما فى مسالة ان الاسم وحده ليس الذى يحكم على الشخصية ولكنه عبارة عن مدلول لهوية الشخصية
    على فكرة يارامى انت ركزت على الاسماء ولم تنتبه الى بقية الاشياء والتى فيها الكثير والمثير Wink
    شكرا اخت سودانية لمداخلتك الانيقة
    شكرا مصطفى على المداخلة اللطيفة
    مروركم نفحنى عطرا ذكيا
    دمتم موفورى الصحة


    _________________


    avatar
    yaseen alameen
    عضو ممــيَّز
    عضو ممــيَّز

    الدفعة : fifteen
    عدد المشاركات : 318
    تاريخ التسجيل : 24/07/2008
    نقاط التمييز : 3860
    التقييم : 0
    دولة الإقامة : السوووووووودااااااااااااان

    رد: نحو أسماء سودانية خالية من الدلع والمياعة

    مُساهمة من طرف yaseen alameen في الأحد 31 يناير 2010, 11:26

    هههههههههههههههههههه
    الموضوع ظابوط صراحه
    بس انا شايف هسه احسن من زمان
    الحياة سهله في داعي نصعبها؟؟؟؟؟؟
    اي الناس ما تصل درجه تتمايع بس كمان ما درجة زمان الناس تحلف عليك طلاق و حركات,, و خلي الناس تتدلع و تعيييييش
    avatar
    رامي كمال
    عضـو جديد
    عضـو جديد

    الدفعة : الرابعة
    عدد المشاركات : 9
    تاريخ التسجيل : 27/09/2009
    نقاط التمييز : 3292
    التقييم : 1

    رد: نحو أسماء سودانية خالية من الدلع والمياعة

    مُساهمة من طرف رامي كمال في الأربعاء 03 فبراير 2010, 23:09

    سلامات للجميع ..
    موضوع نصر الدين موضوع جيد وفيه يبدو ان الرسالة الرئيسية هي لا للتمييع .. طبعا لن يختلف معه احد في ذلك ، التمييع ظاهرة سيئة مع انو في انتشار شديد للمياعة باشكال كتيرة .. لكن ، برضو المقال فيه شيء من عدم الاتزان ...
    - الاسماء : مطلوب الاسماء الرجولية نعم ، لكن طالما الاسم عربي وله معنى عربي طيب فلا بأس، وما تنسى انو الجزولي وعكاشة والريح ووو ... كانت برضو اسامي مايعة عندما ظهرت اول مرة ... وما تنسى ان نسب الرسول صلى الله عليه وسلم فيه لؤي (الجد الثامن) ، نزار(الجدالثامن عشر) ... ولو رجعت الى قبل الرسول صلى الله عليه وسلم وفي انساب العرب ستجد اسماء مثل قيذار، تارح،فهر .... فهل هي موجودة ايام جدي وجدك؟
    - الكعك : ماوجه المياعة في الكعك؟ طيب نحن زي ما عندنا لابتوب وانترنت وتويوتا برادو واصانصير فمن الطبيعي ان يكون في انواع جديدة من الكعك والخبيز والفطير..الا اذا اعتبر الكمبيوتر والنت ومكيف الغاز من اشكال التمييع ...
    - الولادة : بدون تعليق ..
    - الكلاب : ما يزعل الكاتب لسة الكلاب السعرانة موجودة وبي خيرا ، وزي ما في بوبي برضو قي الكلاب البوليسية المرابطة في خدمة المواطنين ...
    فالمياعة نفسها موجودة ، ولكنها سلوك انساني شخصي وليست وباء اجتماعي اجتاح الاسماء والغذاء والحيوان و...
    كل الاحترام للشاعر عبيد عبدالرحمن(رحمه الله) في رائعته حليل زمن الصبا ... لكن تبقى القصيدة لمتأملها - رغم بدايتها القوية - قصيدة غزلية يبكي فيها جزءا (معينا) من الماضي بعيد عن المعاني المقصودة في المقال ..
    ارجع واقول : اخشوشنوا ولكن لا تتطرفوا ... واخيرا كلمة لنصر الدين: وين اجابات الاسئلة التلاتة من رامي عبد اللطيف؟
    avatar
    رامي عبداللطيف
    عضو ســـاحر برونزي
    عضو ســـاحر برونزي

    الدفعة : الحادية عشر
    عدد المشاركات : 604
    تاريخ التسجيل : 04/03/2009
    نقاط التمييز : 4226
    التقييم : 3
    دولة الإقامة : السعودية

    رد: نحو أسماء سودانية خالية من الدلع والمياعة

    مُساهمة من طرف رامي عبداللطيف في الأربعاء 07 يوليو 2010, 23:36

    نصر حبيبي
    انا قريت الموضوع كلو طبعا بس انا رديت على جزء منه

    بس حبيبي انت ما رديت على تساؤلاتي
    بدلعوك شنو وداير تسمي اولادك ايه بعد ما يجو بالسلامة هما قريب
    ربنا يرزقك الزوجة و الذرية الصالحة
    avatar
    نصر الدين الزبير
    مراقب عام
    مراقب عام

    الدفعة : العاشرة
    عدد المشاركات : 1450
    تاريخ التسجيل : 04/09/2008
    نقاط التمييز : 4480
    التقييم : 5
    دولة الإقامة : السودان

    رد: نحو أسماء سودانية خالية من الدلع والمياعة

    مُساهمة من طرف نصر الدين الزبير في الخميس 08 يوليو 2010, 11:57

    الاخ رامى كمال
    اسف للرد المتاخر فيبدو اننى قد نسيت هذا الموضوع لو لم يقم الاخ رامى عبد اللطيف برفعه من جديد
    الموضوع دا موضوع مناكفة ليس الا وشكلو الزول الكاتبو دا ممغوس ساى من الحاصل فى السودان اليومين ديل

    رامى عبد اللطيف
    لمو اجو ساعتها لكل حادث حديث


    _________________


    avatar
    رامي عبداللطيف
    عضو ســـاحر برونزي
    عضو ســـاحر برونزي

    الدفعة : الحادية عشر
    عدد المشاركات : 604
    تاريخ التسجيل : 04/03/2009
    نقاط التمييز : 4226
    التقييم : 3
    دولة الإقامة : السعودية

    رد: نحو أسماء سودانية خالية من الدلع والمياعة

    مُساهمة من طرف رامي عبداللطيف في الأربعاء 14 يوليو 2010, 01:25

    ههههههه
    طيب يا نصووووري
    خليك من الاولاد
    انت بنادوك بشنو اللي في محيطك
    avatar
    نصر الدين الزبير
    مراقب عام
    مراقب عام

    الدفعة : العاشرة
    عدد المشاركات : 1450
    تاريخ التسجيل : 04/09/2008
    نقاط التمييز : 4480
    التقييم : 5
    دولة الإقامة : السودان

    رد: نحو أسماء سودانية خالية من الدلع والمياعة

    مُساهمة من طرف نصر الدين الزبير في الجمعة 16 يوليو 2010, 15:06

    رامي عبداللطيف كتب:ههههههه
    طيب يا نصووووري
    خليك من الاولاد
    انت بنادوك بشنو اللي في محيطك


    مصر تحكها
    ناس البيت بنادونى نصر
    بعض الاصحاب وخاصة حبيبى محمود بقول نصورى



    _________________


    avatar
    رامي عبداللطيف
    عضو ســـاحر برونزي
    عضو ســـاحر برونزي

    الدفعة : الحادية عشر
    عدد المشاركات : 604
    تاريخ التسجيل : 04/03/2009
    نقاط التمييز : 4226
    التقييم : 3
    دولة الإقامة : السعودية

    رد: نحو أسماء سودانية خالية من الدلع والمياعة

    مُساهمة من طرف رامي عبداللطيف في الخميس 29 يوليو 2010, 00:26

    تاني بس نصوووري نناديك
    avatar
    رامي عبداللطيف
    عضو ســـاحر برونزي
    عضو ســـاحر برونزي

    الدفعة : الحادية عشر
    عدد المشاركات : 604
    تاريخ التسجيل : 04/03/2009
    نقاط التمييز : 4226
    التقييم : 3
    دولة الإقامة : السعودية

    رد: نحو أسماء سودانية خالية من الدلع والمياعة

    مُساهمة من طرف رامي عبداللطيف في الخميس 29 يوليو 2010, 00:28

    تاني نناديك نصوري العسولي
    avatar
    نصر الدين الزبير
    مراقب عام
    مراقب عام

    الدفعة : العاشرة
    عدد المشاركات : 1450
    تاريخ التسجيل : 04/09/2008
    نقاط التمييز : 4480
    التقييم : 5
    دولة الإقامة : السودان

    رد: نحو أسماء سودانية خالية من الدلع والمياعة

    مُساهمة من طرف نصر الدين الزبير في الخميس 29 يوليو 2010, 18:18

    رامي عبداللطيف كتب:تاني نناديك نصوري العسولي




    _________________



      الوقت/التاريخ الآن هو الأحد 23 سبتمبر 2018, 12:12